อิธะ ตะถาคะโต โลเก อุปปันโน อะระหัง สัมมาสัมพุทโธ,
ธัมโม จะ เทสิโต
นิยยานิโก อุปะสะมิโก ปะรินิพพานิโก สัมโพธะคามี สุคะตัปปะเวทิโต, มะยันตัง
ธัมมัง สุตวา เอวัง ชานามะ,
ชาติปิ ทุกขา ชะราปิ ทุกขา มะระณัมปิ ทุกขัง,
โสกะปะริเทวะทุกขะโทมะนัสสุปายาสาปิ ทุกขา,
อัปปิเยหิ สัมปะโยโค ทุกโข ปิเยหิ
วิปปะโยโค ทุกโข,
ยัมปิจฉัง นะ ละภะติ ตัมปิ ทุกขัง,
สังขิตเตนะ ปัญจุปาทานักขันธา ทุกขา,
เสยยะถีทัง, รูปูปาทานักขันโธ, เวทะนูปาทานักขันโธ, สัญญูปาทานักขันโธ,
สังขารูปาทานักขันโธ, วิญญาณูปาทานักขันโธ,
เยสัง ปะริญญายะ ธะระมาโน
โส ภะคะวา, เอวัง พะหุลัง สาวะเก วิเนติ,
เอวัง ภาคา จะ ปะนัสสะ ภะคะวะโต
สาวะเกสุ อะนุสาสะนี พะหุลา ปะวัตตะติ,
รูปัง อะนิจจัง, เวทะนา อะนิจจา, สัญญา
อะนิจจา, สังขารา อะนิจจา, วิญญาณัง
อะนิจจัง, รูปัง อะนัตตา, เวทะนา อะนัตตา,
สัญญา อะนัตตา, สังขารา อะนัตตา,
วิญญาณัง อะนัตตา, สัพเพ สังขารา อะนิจจา,
สัพเพ ธัมมา อะนัตตาติ,
เต มะยัง, โอติณณามะหะ ชาติยา ชะรามะระเณนะ,
โสเกหิ
ปะริเทเวหิ ทุกเขหิ โทมะนัสเสหิ อุปายาเสหิ,
ทุกโขติณณา ทุกขะปะเรตา,
อัปเปวะนามิมัสสะ เกวะลัสสะ ทุกขักขันธัสสะ อันตะกิริยา ปัญญาเยถาติ,
จิระปะรินิพพุตัมปิ
ตัง ภะคะวันตัง อุททิสสะ อะระหันตัง สัมมาสัมพุทธัง,
สัทธา อะคารัสมา
อะนะคาริยัง ปัพพะชิตา,
ตัสมิง ภะคะวะติ พรัหมะจะริยัง จะรามะ,
ภิกขูนัง สิกขาสาชีวะสะมาปันนา,
ตัง โน พรัหมะจะริยัง อิมัสสะ เกวะลัสสะ
ทุกขักขันธัสสะ
อันตะกิริยายะ
สังวัตตะตุ ฯ |
